Angels

The Voice of Angels

deur Sarel Botha 

14 September 2008 - Sjoe! Dit is feitlik uitputtend om te probeer soek vir iets wat moontlik verkeerd kan wees met 'n album wat uitmuntende standaard reflekteer en sonder twyfel deur meesters gekonstrueer is. Met bekende produksiebestuurder Niël Schoombee en die meesterlike afrigting en ander ondersteuning deur Hendrik D Loock kan daar net absolute werk soos vanuit die hemel geskep word.

Reg van die eerste noot af word mens meegevoer na 'n ander wêreld - een van rustigheid, skoonheid, puurheid, onskuldigheid en amperse "sonder sonde" atmosfeer. Die ANGELS, wat bestaan uit 17 talentvolle kinders tussen die ouderdomme 11 en 14 wie se stemme voorwaar geklassifiseer kan word as engelstemme, is geselekteer uit die Tygerbergse Kinderkoor wat al meer as 36 jaar lank bestaan en wat omtrent elke moontlike toekenning in die wêreld ontvang het.

Wat my die meeste beïndruk het is die feit dat die album 'n helende "vergeet-van-die-wêreld daarbuite"-uitwerking op mens het. Dis asof jy sweef tussen klank, stem en wolke en wanneer jy klaar geluister het, is dit asof jy terapie en massering ontvang het en sommer weer pure mens voel.

Die repertoire is baie versigtig gekies en elke noot perfek beplan en ek daag enigeen uit om te probeer 'n enkele noot kry wat selfs soveel as 'n fraksie van die noot af is. Dit laat mens met 'n gerustheid dat jy maar voluit kan luister, want daar sal absoluut geen onaangename verrassings wees nie.

Hierdie is 'n album wat heeltemal van die hoofstroom afwyk, maar ironies genoeg hoofstroom musiek gebruik om dit te doen - 'n feit wat na my mening die sukses van hierdie konsep sal onderstreep in die tye wat kom. Die snaarinstrumente word deur Eclips gespeel wat verder die kwaliteit van die album beklemtoon.

Ons het elkeen so een keer per week 'n pure stiltetyd nodig waar mens weer jouself kan vind - met hierdie album wat in die agtergrond speel sal jy beslis jou doelwit met gemak en pure plesier bereik. As jy 'n persoon is wat van lewendige musiek hou en gladnie plek in jou hart het vir ander genrés nie: Ek daag jou uit om hierdie album aan te skaf, dit drie keer deur te luister en dan nog vir my te sê dit staan jou nie aan nie - man, hulle vat raak!

Persoonlike gunsteling: Yesterday

Gradering (maksimum is *****):

Musikaliteit: *****

Kommersiële potensiaal: ***

Repertoire: *****

Produksie: *****

Algeheel: ****

Nog resensies ... klik hier!